په ننګرهار او هلمند ولایتونو کې د چاپېریال ساتنې او زرغونتیا په موخه د نیالګیو کېنولو ملي کمپاین پيل شوی دی. د لښکرګاه ښاروالۍ مسوولینو ویلي چې د هلمند ولایت په مرکز لښکرګاه ښار کې د ۲۲ زره مېوه لرونکو او غیر مېوه لرونکو نیالګیو د کېنولو چارې پیل شوې دي. د لښکرګاه ښاروالۍ د اوبولګولو مدیر مولوي انعام الله د معلوماتو له مخې، دغه کمپاین به د ښار په ۸ بېلابېلو ناحیو کې عملي شي، چې پکې ۴ زره مېوه لرونکي او ۱۸ زره غیر مېوه لرونکي نیالګي کینول شي.
