د ترکیې ساحلي ګارد خبر ورکړی، چې په چاناک کلا ښار کې یې د عملیاتو پرمهال د ۱۷ ماشومانو په ګډون ۳۹ افغان پناهغوښتونکي نیولي دي. ترکي چارواکو ویلي، چې په دې عملیاتو کې یو بل کس د انساني قاچاق په تور نیول شوی دی. ترکي رسنیو راپور ورکړی، چې نیول شوي افغان پناهغوښتونکو د اوسېدو قانوني اسناد نهلرل او وروسته د ایواجیک د کډوالو د ساتنې مرکز ته لېږدول شوي دي. د ترکيې د کډوالۍ ادارې د رسمي وېبپاڼې د مالوماتو له مخې؛ یوازې په ۲۰۲۵ زېږدیز کال کې په ټوله ترکیه کې ۴۴زره او ۱۵۷ بېاسناده افغان کډوال نیول شوي دي. د یادې ادارې شمېرې ښيي، چې د روان کال په لومړیو دوو اونیو کې تر ۱۵۰۰ ډېر افغان پناهغوښتونکي نیول شوي دي.
