د راپورونو له مخې د امریکا په ګڼو ایالتونو کې د سخت ژمي، واورې او توپان له امله شاوخوا یو میلیون کسان له برېښنا بېبرخې شوي او نږدې ۱۰ زره الوتنې هم لغوه شوې دي. د مالوماتو له مخې دغه توپان، چې درنه واوره، کنګل او سخته یخني ورسره مل ده، د امریکا ختیځې سیمې له فلج کېدو سره مخ کړې دي. ولسمشر ډونالډ ټرمپ دغه توپان «تاریخي» بللی او په یو شمېر ایالتونو کې یې فدرالي بیړنی حالت اعلان کړی دی. د امریکا د کورني امنیت وزارت ویلي، په ۱۷ ایالتونو او واشنګټن ډيسي کې د هوا بیړنی حالت اعلان شوی دی. په یادو ایالتونو کې چارواکو خلکو ته د سونتوکو او خوړو د زېرمه کولو سپارښتنه کړې او ویلي یې دي چې د برېښنا د بېرته فعالولو لپاره تخنیکي ډلې پر کار بوختې دي.
