د عامې روغتیا وزارت خبر ورکړی، چې مولوي نور جلال جلالي د خوړو نړیوال پروګرام له عمومي مشر جان ایلیف او مل پلاوي سره کتلي دي. سرچینې ویلي، چې په دې کتنه کې د عامه تغذیې خدمتونو پراختیا، د روانو مرستو ارزونه، د پروګرامونو اغېزمنتیا او د راتلونکو همکاریو پر څرنګوالي خبرې شوې دي. د عامې روغتیا وزیر ويلي، چې د تغذیې خدمتونو پیاوړتیا د هېواد له بنسټیزو روغتیایي اړتیاوو ده او مرستې باید منظمې او د خلکو د واقعي اړتیاوو پر بنسټ وي. د خوړو نړیوال پروګرام مشر بیا د کونړ د زلزلهځپلو او راستنو شويو کډوالو سره د مرستو د دوام ډاډ ورکړی دی.
