د صنعت او سوداګرۍ وزیر، نورالدین عزیزي د یوه لوړپوړي پلاوي په مشرۍ د هند په رسمي بلنه، نوي ډیلي ته ولاړ. د دغه وزارت په خبرپاڼه کې راغلي چې د سفر موخه د چابهار بندر د ظرفیتونو فعاله کارونه، د هند د پانګونې جلب او د دواړو هېوادونو ترمنځ د سوداګرۍ پراختیا ده. د دغه سفر پر مهال به افغان پلاوی د پراګتي میدان نړۍوال نندارتون له لیدنې سربېره د هند د بهرنیو چارو او سوداګرۍ له وزیرانو، سوداګرو، پانګوالو او د خصوصي سکټور له غړو سره وګوري. هند ته د افغاني پلاوي دغه سفر د کابل او نوې ډيلي د اړیکو د اقتصادي پیاوړتیا په لور یو مهم ګام بلل کېږي او تمه ده چې پایلې به یې د تماسونو په پراخېدو، د سوداګرۍ په وده او د سیمې په ټرانزیټي دهلیزونو کې د افغانستان د رول په زیاتېدو کې مهمه اغېز ولري.
