د هرات د سوداګرۍ او پانګونې خونې اجراییوي مشر محمد یوسف امین ويلي، چې د روان کال په لومړیو میاشتو کې له دغه ولایت څخه بهرنیو هېوادونو ته د وچې مېوې صادرات ۳۷ میلیونه او ۶۰۰ زره ډالرو ته رسېدلي دي. هغه زیاته کړې، چې د تازه مېوې صادرات هم ۹۱۸ زره ډالرو ته رسېږي. د نوموړي په وینا، په صادر شویو وچو مېوو کې جنغوزي، پسته، بادام او د هندواڼو زڼي شامل دي، او په تازه مېوو کې بیا مڼې، الوچې او ګیلاس ډېر صادر شوي دي. امین وایي، دا محصولات یوازې د هرات نه، بلکې د نورو ولایتونو مېوې هم د اسلامکلا بندر له لارې صادرې شوې دي. د سوداګرۍ خونې د مسوولینو په باور، د صادراتو لپاره ښه فرصتونه برابر شوي، او تمه ده چې د کال تر پایه د وچې مېوې صادرات ۴۵ میلیونو او د تازه مېوې دوه میلیونو ډالرو ته لوړ شي.
