د لغمان ولایت د مهترلام ښاروالۍ مسوولینو خبر ورکړی، چې یادې ښاروالۍ د روان کال په تېرو ۶ میاشتو کې ۵۵ میلیونه افغانۍ عواید راټول او د دولت خزانې ته یې سپارلي دي. د مسوولینو په خبره د ۱۴۰۴ لمریز کال د لومړیو شپږو میاشتو راټول شوي عواید د تېر کال د ورته مودې په پرتله ۱۱ میلیونه افغانۍ زیاتوالی ښيي. دوی زیاتوي، چې دغه عواید د مارکېټونو، غرفو، ښاري خدمتونو، جوازونو د وېش او نورو بېلابېلو سرچینو څخه راټول شوي دي. د مالوماتو له مخې د مهترلام ښاروالۍ سږ کال د شاوخوا ۱۰۳ میلیونه افغانیو په لګښت ۱۱ انکشافي پروژې پلې کوي، چې پکې د سړکونو، کانالونو، پلچکونو، پلو لارو جوړول، د ښار تجارتي مارکیټ جوړول، د پارکونو زرغونول، د چاپېریال ساتنې لپاره د کثافتدانیو جوړول او د کابل ـ جلال آباد د هډې په سیمه کې د تیلو پمپ استیشن جوړول شامل دي.
