د میدان وردګو د بدني روزنې او ورزش امریت مسوولین وایي چې د دغه ولایت په کوربتوب د کابل او غزني ولایتونو ترمنځ د والیبال سیالۍ پای ته ورسېدې. د دغه ولایت د بدني روزنې او ورزش امر ذبیحالله وهاج ویلي، چې یادې سیالۍ د والیبال فدراسیون له لوري د میدان ښار په دولتي جمنازیوم کې جوړې شوې وې چې یوه ورځ یې دوام وکړ. وهاج وایي چې په یادو سیالیو کې د میدان وردګ، کابل او غزني ولایتونو شپږو لوبډلو ګډون درلود چې په پایلوبه کې د غزني مبارز ستوري لوبډلې د کابل مبارز ځواک ته د ۳-۱ ماته ورکړه او د دغو سیالیو اتلولې یې خپله کړه.
