د هرات ولایت ځایي چارواکو خبر ورکړی، چې د دغه ولایت په صنعتي ښارګوټي کې ۶۰ میلیونه ډالرو په پانګونې سره ۱۰ نوې تولیدي کارخونې پرانیستل شوې دي. د دې کارخونو د پرانیستې په مراسمو کې د هرات والي شیخ نور احمد اسلامجار، د صنعت او سوداګرۍ وزارت معین مولوي احمدالله زاهد، دولتي چارواکو، سوداګرو او صنعتکارانو ګډون درلود. د صنعت او سوداګرۍ وزارت معین مولوي احمدالله زاهد په جوړه شوې غونډه کې ویلي، چې هرات د هېواد په کچه د تولید په برخه کې یو ممتاز ولایت دی او ټینګار یې وکړ، چې اقتصادي خپلواکۍ ته رسېدل یوازې د کورني صنعت د ودې او ځان بساینې له لارې ممکن دي.
