د کرنې وزارت خبر ورکړی، چې د کرنې او مالدارۍ مرستیال مولوی صدراعظم عثماني د ملګرو ملتونو د خوړو او کرنې ادارې ( ایف اې او) د پروګرامونو له عمومي رییس او مل پلاوي سره کتلي دي. په دې کتنه کې، چې د کرنې او مالدارۍ د معینیت یو شمېر رییسان او مسلکي سلاکاران هم ګډون درلود، د ګډو چارو او راتلونکو پلانونو په اړه بحث او نظرونه شریک شول. مولوی صدراعظم عثماني ټینګار وکړ، چې د دواړو ادارو پلانونه باید د خلکو د اړتیاوو پر بنسټ عملي شي، تر څو افغانستان د اقلیم د بدلون، وچکالۍ او طبیعي افتونو له ګواښونو خوندي پاتې شي او بزګرانو او مالدارانو ته د دوی د اړتیاوو مطابق چوپړتیاوې وړاندې شي.
