د ملګرو ملتونو د ښځو څانګې په خپل تازه راپور کې ویلي، چې له ۲۰۲۲ کال راهیسې افغان نجونې او ښځې د طبیعي پېښو له امله تر ټولو زیاتې زیانمنې شوې دي. د راپور لهمخې، شاوخوا ۷۱ سلنه خلک د طبیعي پېښو له اغېزو سره مخ شوي، چې په هغوی کې ښځې او نجونې د ګڼو ستونزو سره لاس او ګرېوان دي. راپور کې راغلي، چې د دوامدارې وچکالۍ له امله د ډېرو کورنیو معیشت له منځه تللی او هغوی اړ شوي دي، چې ناوړه حل لارې لکه د ماشومانو کار ته لېږل، د نجونو د کم عمر ودونو ترسره کول او ناقانونه کډوالۍ غوره کړي. دغه راپور زیاتوي، چې د وچکالۍ له اغېزو سره مخ ۸۱ سلنه کسانو تر اوسه مرسته نه دي ترلاسه کړي او د ښځو ځانګړې اړتیاوې، په ځانګړي ډول د امیندوارو او شیدې ورکوونکو مېرمنو اړتیاوې، له پامه غورځول شوې دي.
