د بغلان ولایتي مسوولین وايي چې روان کال په دغه ولایت کې د څښاک اوبو رسولو ۲۹ پروژې پلې شوي، چې له امله یې زرګونه اوسېدونکي له پاکو اوبو څخه برخمن شوي دي. د یاد ولایت د کلیو بیارغونې او پراختیا ریاست مسوولینو ویلي چې په یاد شمېر پروژو کې ۹ شبکې نوې جوړې شوي او ۲۰ نورې بیا رغول شوې دي. د دوی په وینا، یادې پروژې د ۷۴.۱ میلیونه افغانیو په لګښت پلې شوې، چې له امله یې ۲۳ زره کسان د پاکو اوبو اسانتیاوو ته لاسرسی موندلی دی. د اوبو رسولو یادې شبکې د بغلان ولایت په پلحصار، خنجان، دوشي، مرکزي بغلان، بنو، دهنه غوري، برکې، نهرین او خوست ولسوالیو کې جوړې او بیا رغول شوې دي.
