د بامیانو ولایت ځایي چارواکي وایي، چې د دغه ولایت په یکاولنګ نمبر یک ولسوالۍ کې د نجونو ابتدائیه ښوونځي ته ودانۍ جوړه او د دغه ولایت د والي مولوي عبدالله سرحدي له لوري ګټې اخیستنې ته سپارل شوې ده. د یادې ودانۍ د پرانیستې په مراسمو کې د بامیانو والي مولوي عبدالله سرحدي له زدهکوونکو وغوښتل، چې د تعلیم او لوړو علمي او مسلکي درجو ترلاسه کولو لپاره هڅې وکړي. هغه د خلکو ترمنځ د یووالي، ورورولۍ او اسلامي ارزښتونو پر پیاوړتیا ټینګار وکړ. ورته مهال په افغانستان کې د کډوالو عالي کمېشنرۍ عملیاتي برخې مسوولینو ویلي، چې دغه ودانۍ د (یو این ایچ سي ار) موسسې په مالي ملاتړ د ۲۲ میلیونه افغانیو په لګښت جوړه شوې، چې ۶ درسي خونې، د کمپیوټر او لابراتوار لپاره ۲ جلا خونې، ۲ اداري خونې، د ساتونکي کوټه، مېزونه، څوکۍ، لمریزه برېښنا، د اوبو سېستم، احاطه او نور اړین محلقات لري.
