د ټولګټو چارو وزارت په یوه خبر پاڼه کې ویلي، چې په تېره یوه اوونۍ کې د اوسپنې پټلۍ له لارې د ۶۶ زره او ۲۹۸ مټریک ټنه انتقالات ترسره شوي دي. په خبر پاڼه کې راغلي، چې په دې صادراتو او وارداتو کې نفتي، غیر نفتي او نور توکي شامل دي. د خبرپاڼې له مخې د صادراتو کچه ۵ زره او ۸۲۲ ټنه ښودل شوې او د دې صادراتو لویه برخه وچه مېوه، د انارو جوس، کینو او کچالو جوړوي. یاد وزارت زیاتوي، چې له حیرتان بندر څخه ۵۰ زره او ۷۹۲ ټنه، له اقینې بندر څخه څلور زره او ۳۶۴ ټنه، له تورغونډۍ بندرڅخه اووه زره او ۶۱۲ ټنه او د خواف – هرات څخه درې زره او ۵۳۰ ټنه انتقالات شوي دي. د یادولو وړ ده، چې د ۱۴۰۳ کال په کب کې له افغانستان تر ټولو ډېر صادرات هند، پاکستان او عربي متحده اماراتو ته شوي دي.
