د امریکا د کانګرس دوه غړي پرون دمشق ته رسېدلي ترڅو د سوریې له چارواکو سره وګوري. د بشارالاسد حکومت له نسکورېدو وروسته دا د امریکا د کانګرس د استازو لومړی سفر دی. د امریکا د فلوریډا استازی کوري ملز او د انډیانا مارلین سټوټزمن، دواړه د ولسمشر ډونالډ ټرمپ د جمهوري غوښتونکي ګوند غړي دي.ملز د سوریې له نوي ولسمشر احمد الشارع سره کتلي. د راپور له مخې د دوی غونډه ۹۰ دقیقې وه او دوی د امریکا په بندیزونو او پر ایران خبرې کړې دي. د سوریې نوي مشرتابه په امریکا او اروپا فشار راوړی چې په بشپړ ډول بندیزونه لرې کړي ترڅو دا هېواد وکړای شي د یوې لسیزې جګړې له امله ویجاړ شوی اقتصاد ورغوي.
