پاکستان کې د افغانستان سفارت په یوه خپره کړې خبرپاڼه کې ویلي، چې د صنعت او سوداګرۍ وزارت د سرپرست، نور الدین عزیزي په مشرۍ پلاوي د پاکستان د سوداګرۍ له وزیر جام کمال خان سره کتلي دي. د خبر پاڼې له مخې په دې کتنه کې پر دوه اړخیزه سوداګرۍ، ټرانزیټ او دغو برخو کې یې پر شته ستونزو او حل لارو خبرې کړې دي. خبرپاڼه زیاتوي، چې په دغه کتنه کې د کډوالو او راستنېدونکو چارو وزارت مرستیال کلیم الله فاني له پاکستانه د افغان کډوالو پر جبري ایستلو اندېښنه څرګنده کړې او ټینګار یې کړی چې دغه چاره باید د پاکستان له لوري په تېرو څلورو لسیزو کې د افغانانو د کوربتوب ښه نیت کمزوری نه کړي. نوموړي دغه راز له پاکستاني لوري غوښتي چې د افغان کډوالو د ایستلو بهیر باید منظم، با عزته او د کوربتوب له اصولو سره سم ترسره کړي.
