د چین د بهرنیو چارو وزیر وانګ يي ویلي، چې غزه د فلسطین په خلکو پورې اړه لري او «د فلسطین د خاورې یوه نه بېلېدونکې برخه ده» نوموړي ویلي، د دې ساحلي سیمې په وضعیت کې هر جبري بدلون به یوازې د لا زیاتې بېثباتۍ لامل شي.
هغه ټینګار کړی چې لومړیتوب باید د اسرائیلو او فلسطین د دوو خپلواکو دولتونو جوړېدل وي ځکه همدا تر ټولو ښه حللاره ده.
وانګ یې ویلي چې بیجینګ به د منځني ختیځ د خلکو لپاره د عدالت، سولې، او پرمختګ لپاره خپلې قاطع هڅې ته دوام ورکړي.
د چین د بهرنیو چارو وزیر دغه څرګندونې د امریکا ولسمشر ډونالډ ټرمپ د هغه پلان په غبرګون کې کړې دي، چې له مخې یې امریکا غواړي غزه ونیسي او دا سیمه بیا ورغوي.
ټرمپ همداراز غوښتنه کړې چې د غزې اوسېدونکي فلسطینیان نورو سیمو ته، لکه مصر او اردن ته، ولېږدول شي.
د ټرمپ د غزې د نیولو پلان له پراخو نړیوالو نیوکو سره مخ شوی دی.
