د پنجشیر ولایت د کرنې، اوبو لګولو او مالدارۍ ریاست مسوولینو ویلي، چې سږ کال یې په دغه ولایت کې د کرنیزو محصولاتو د ساتنې لپاره ګڼ شمېر معیاري سړې خونې بیا رغولې دي. د مسوولینو په خبره دغه سړې خونې د کرنیزو محصولاتو د ضایع کېدو د مخنیوي او د کروندګرو د عایداتو د زیاتوالي لپاره خورا اړینې دي، چې د یاد ولایت په مرکز بازارک او ۷ ولسوالیو کې بیا رغول شوې او ګټې اخیستنې ته سپارل شوې دي. سرچینې زیاته کړې چې تردې مهاله په یاد ولایت کې ۵۷ معیاري سړې خونې فعالې دي چې په کې د کروندګرو پیاز، کچالو، مڼې او نور کرنیز محصولات په کې ساتل کېږي.
