د نیمروز ولايت د احصايې او معلوماتو ریاست مسوولینو خبر ورکړی، چې تېر کال په دغه ولایت کې ۲۳ زره او ۳۱۹ برېښنايي او ۱۹ زره او ۵۸۳ کاغذي پېژندپاڼې وېشل شوې دي. د دغه ولايت د احصايې او معلوماتو ریاست مسوولین وایي، چې د مرکز په ګډون د دې ولايت په ټولو ولسواليو کې د دوی اړوند دفترونه فعال دي او تېر کال د يادو دفترونو له لارې توانيدلي، چې ۱۶ زره او ۷۲۴ کسانو ته په کاغذي پېژندپاڼو کې د اصلاحاتو او ۱۵زره او ۹۷۰ نورو کسانو ته د ژوند پېښو (۱۴ زره او ۳۰۴ زېږون کارتونه، ۲۷۸ د مړینې پارچې، ۱۳۷۹ د واده او ۹ د طلاق ثبت) اړوند خدمتونه وړاندې کړي. د نوموړي په وینا، اوسمهال په دغه ولایت کې د برېښنايي پېژندپاڼو د وېش یوه څانګه فعاله ده چې هره ورځ ښځینه او نارینه غوښتونکو ته خدمتونه وړاندې کوي.
