ټاکل شوې چې نن ماښام ۶ بجې د افغانستان او سریلانکا کرکټ ملي لوبډلو ترمنځ درېیمه یا وروستۍ شل اوریزه لوبه ترسره شي. افغان لوبډلې له کوربه سریلانکایي لوبډلې څخه تردې دمه هیڅ کومه لوبه نه ده ګټلې. په پیل کې یې یوازینۍ ټیسټ لوبه، بیا د دریو ۵۰ اوریزو لوبو لړۍ او ورپسې یې د شل اوریزو لوبو لړۍ د سریلانکا پر وړاندې بایللې دي. نن ورځ د دواړو لوبډلو ترمنځ د دریو شل اوریزو لوبو د لړۍ وروستۍ لوبه ترسره کیږي. له افغان لوبډلې که څه هم چې تمه کېدله د شل اوریزو لوبو لړۍ له سریلانکا څخه وګټي؛ خو داسې ونه شول او دواړه د سر لوبې سریلانکا لوبډلې وګټلې. افغان لوبډله د سریلانکا په سفر د پرله پسې لوبو په بایللو سره له یوه بد حالت سره مخ ده او دا هغه څه دي، چې د ګڼ شمېر کرکټ مینوالو او کرکټ مبصرینو غبرګونونه یې راپارولي دي. دوی په کرکټ بورډ او لوبغاړو نیوکې کړې دي.
