د امریکا دفاع وزارت وايي چې له اوکراین سره د ۲۰۰ میلیونه ډالرو په ارزښت نوې پوځي مرستې کوي. دا د امریکا په کانګرس کې له اوکراین سره د مرستو د کموالي له کړکېچ وروسته لومړۍ د پوځي مرستو بسته ده، چې د امریکا د دفاع وزیر یې اعلانوي. نوموړي ویلي، چې په دې مرستو کې به هوایي مدافع، توغندي، د توپچي مهمات او د زرې ټانکونو ضد سیستم شامل وي. د امریکا د دفاع وزیر په دغه غونډه کې له اوکراین سره د امریکا د دوامدارو مرستو ژمنه وکړه او ویې ویل، چې د اوکراین په دفاع کې به له دوی سره همکار پاتې شي. امریکا له اوکراین سره د روسیې د برید له پیل راهیسې نږدې ۴۴ میلیارده ډالره پوځي مرسته کړې، چې ټانکونه، راکټونه او په میلیونونو مرمۍ پکې شاملې دي.
