په کابل کې د ازبکستان سفیر یادګار خواجه شادمانوف ویلي چې د ازبکستان د لومړي وزیر د مرستیال په مشرۍ به یو جګپوړی پلاوی په راتلونکو ورځو کې له تاشکند نه کابل ته سفر وکړي. په کابل کې د ازبکستان سفیر له ملي ټلوېزیون سره په مرکه کې همدارنګه ویلي کهچېرې سرپرست حکومت د نړۍوالې ټولنې غوښتنو ته پاملرنه وکړي، د ازبکستان او نورو هېوادونو له لوري به په رسمیت وپېژندل شي. په کابل کې د ازبکستان سفیر زیاتوي، چې په کابل کې د ازبکستان، قطر، ترکيې، چین، پاکستان، هند، ترکمنستان، قزاقستان او د اسلامي همکاریو د سازمان سفارتونه فعال دي او له دوی سره د سرپرست حکومت اړیکې مخ په پیاوړي کېدو دي. د ټولګډونه حکومت جوړېدل، د بشري حقونو په ځانګړي ډول د ښځو حقونو خونديتوب، د افغانستان خاوره د نورو هېوادونو پر ضد نه کارېدل هغه شرایط دي، چې نړۍ سرپرست حکومت سره د تعامل لپاره وړاندې کړي دي.
