د قطر د بهرنیو چارو وزارت وايي چې دوحې د افغانستان په مسایلو کې د یوه منځګړي رول لرلی او همدارنګه د دغه هېواد او نړۍ ترمنځ د سیاسي لارې د موندلو لپاره هڅه کوي. د قطر د بهرنیو چارو وزارت ویاند ماجد محمد الانصاري په یوه خبري ناسته کې کندهار ته د قطري پلاوي د وروستي سفر په اړه ویلي، چې په دغه سفر کې پر مهمو اقتصادي مسایلو خبرې شوې دي. ماجد محمد الانصاري زیاته کړې، قطر د افغانستان د سوکالۍ لپاره د ورور افغانستان له خلکو سره د مرستو په برخو کې ستره ونډه اخیستې ده. اوس قطر د بشري مرستو او همداراز د افغانستان او نړۍ تر منځ د یوې سیاسي لارې د رامنځته کېدو په تړاو هڅې کوي. له دې سره سم، د سیاسي چارو ځينې شنونکي هم په هېواد کې د سولې او سوکالۍ لپاره د قطر رول مهم ګڼي او زیاتوي چې، سرپرست حکوت له نړۍوالو سره د اړیکو د ښهوالي لپاره باید په خپل بهرني سیاست کې بدلون راولي.
