د لوړو زدهکړو سرپرست وزیر وايي چې د پوهنتونونو پر ښوونیز نصاب د بیاکتنې کار پای ته رسېدلی او ډېر ژر به خپور شي. نوموړی چې پروان ولایت ته تللی په یوې غونډه کې ویلي چې د پوهنتونونو استادانو ته به د ماسټرۍ او دوکتورا تر کچې د زده کړو زمینه دننه په هېواد کې برابره شي. د لوړو زدهکړو وزارت سرپرست همداراز په هېواد کې د ځينو خصوصي پوهنتونونو له لوري د جعلي اسنادو پر ورکړې نیوکه کوي او وایي چې خصوصي پوهنتونونه هم باید د دولتي پوهنتونونو په څېر د لوړو زدهکړو وزارت پر معیارونو برابر شي. ورته مهال، د پوهنتونونو ځينې محصلین، په اوسنیو شرایطو کې نجونو ته د زدهکړو د دوام لپاره د اجازې ورکړه یوه اړتیا بولي او د سرپرست حکومت له مسوولینو غواړي چې نجونو ته پوهنتون ته د تلو اجازه ورکړي.
