په سعودي عربستان کې د افغانستان سفیر احمد جاوېد مجددي وایي چې په سوډان کې د بند پاتې افغانانو څخه یې ۴۳ تنه د سعودي حکومت لخوا جدې ښار ته ورسول شول. هغه چې په خپله ددې کسانو هرکلي لپاره د جدې ساحل ته ورغلی و، ویلي چې پاتې کسان به هم ډېر ژر وایستل شي. تر دې مخکې هغه ویلي و، چې په سوډان کې د بند پاتې افغانانو لېستونه، پاسپورټونه، اسناد او نور معلومات د سعودي د بهرنیو چارو وزارت سره یې شریک کړې دي. بلخوا د افغانستان د سرپرست حکومت د بهرنیو چارو وزارت هم منلې ده چې د دوی په پر له پسې هڅو او د سعودي عربستان په همغږۍ او همکارۍ وتوانیدل چې په سوډان کې د بند پاتې افغانانو دویمه جوپه هم چې ٤٣ تنه دي له یاد هېواد څخه په خوندي ډول د سعودي عربستان جدې ښار ته ولیږدوی .سرچینې زیاته کړې چې دغه کسان هلته به د افغان قونسلګرۍ له لوري په هوټلونو کي ځای پرځای کیږي او په لنډ وخت کې به هېواد ته راستانه کړل شي.
