د افغانستان بانک د ټولو انفرادي جوازونو د فسخ کولو خبر ورکړی دی. دغه بانک په یوه خپره کړې خبرپاڼه کې ویلي، چې د افغانستان بانک د غیر بانکي مالي مؤسسو په ځانګړې توګه د صرافیو او پولي خدمتونو د روڼتیا، ښه تنظیم او څارنې په موخه اړوند مقررات تعدیل او له معیارونو سره سم، لازم شرایط وضع کړي دي. سرچینې زیاته کړې، د افغانستان بانک له نویو شرایطو سره سم، ټول انفرادي جوازونه فسخ کړي او د تېر کال په بهیر کې يې ۸۷۶ صرافانو او د پولي خدمتونو وړاندې کوونکو ته شرکتي جوازونه ورکړي، چې د هغوی کړنې معیاري او په کړنو کې يې روڼتیا او اسانتیاوې رامنځته شوې دي. د یادونې وړ ده چې د افغانستان بانک، د بانکي سکتور ترڅنګ، د غیر بانکي مالي مؤسسو چې صرافان، د پولي خدمتونو وړاندې کوونکي، د برېښنايي پیسو، تادیاتي او د وړو پورونو مؤسسې پکې شاملې دي؛ د تنظیم او پر کړنو د څارنې مسئولیت پرغاړه لري.
