ذبیحالله مجاهد ویلي چې د پاکستان ځانګړو نظامي کړیو یو ځل بیا د افغانستان هوايي حریم نقض کړی او د هېواد ځینې سیمې یې د هوايي بریدونو هدف ګرځولي دي. د هغه په وینا، دغه بریدونه ناوخته د شپې په ننګرهار او پکتیکا ولایتونو کې ترسره شوي چې په پایله کې یې لسګونه ملکي وګړي، د ښځو او ماشومانو په ګډون، شهیدان او ټپیان شوي دي.
په ننګرهار ولایت کې ځايي سرچینو ویلي چې د بهسود ولسوالۍ اړوند د ګردي کڅ په سیمه کې پاکستاني الوتکو د شهابالدین په نوم د یوه ملکي کس پر کور بمباري کړې ده. د دغو سرچینو د معلوماتو له مخې، په دې برید کې د سیمې ګڼ شمېر اوسېدونکو ژوند له لاسه ورکړی دی. ځايي رسنیو راپور ورکړی چې لا هم د شاوخوا ۲۳ کسانو د خاورو لاندې د راایستلو هڅې روانې دي.
همدارنګه په ټولنیزو رسنیو کې خپاره شوي راپورونه او ویډیوګانې ښيي چې د پکتیکا ولایت د برمل ولسوالۍ کې هم د پاکستاني ځواکونو د تازه بریدونو له امله ملکي وګړو ته مرګ ژوبله او مالي زیانونه اوښتي دي.
د افغانستان اسلامي امارت د ملي دفاع وزارت په یوه اعلامیه کې دغه بریدونه د تېرو تجاوزونو دوام بللی او ویلي یې دي چې پاکستاني ځواکونو د ننګرهار او پکتیکا ولایتونو په څو ملکي سیمو کې، چې یوه دیني مدرسه او څو استوګنیز کورونه هم پکې شامل دي، هوايي بریدونه ترسره کړي دي. په اعلامیه کې راغلي چې په دغو بریدونو کې لسګونه بېګناه ملکي وګړي، د ښځو او ماشومانو په ګډون، شهیدان او ټپیان شوي دي.
د ملي دفاع وزارت دغه عمل د افغانستان د ملي حریم ښکاره نقض او د نړیوالو قوانینو، د ګاونډیتوب اصولو او اسلامي ارزښتونو خلاف بللی او په کلکو ټکو یې غندلی دی. په اعلامیه کې ټینګار شوی چې د هېواد د حریم دفاع او د خلکو د امنیت ساتنه د دې وزارت شرعي او ملي مسؤلیت دی او په مناسب وخت کې به د دې اقدام مناسب او حساب شوی ځواب ورکړل شي.
په همدې حال کې، عبدالسلام ضعیف، په پاکستان کې د اسلامي امارت پخواني سفیر، وروستي بریدونه د افغانستان پر حریم تېری او «ناروا او بزدلانه عمل» بللی دی. هغه ویلي چې پاکستان د خپلو داخلي ناکامیو د پټولو لپاره بېګناه خلک په نښه کوي او له خپلو مسؤلیتونو تېښته کوي.
