په کونړ ولایت کې زلزله ځپلې کورنۍ وایي د وروستیو ورښتونو له امله له سختو ستونزو سره مخ دي. د دغه ولایت د څوکۍ ولسوالۍ اوسېدونکي وايي، کومو سیمو کې چې د دوی لپاره خېمې درول شوې وې، د واورو د ورښت له امله چپه شوې دي. په ورته وخت کې په افغانستان کې د ملګرو ملتونو د ماشومانو ملاتړ صندوق (یونسیف) هم د کونړ په زلزله ځپلو سیمو کې ورښتونو له امله د ماشومانو، ښځو او معلولینو د وضعیت په اړه اندېښنه ښودلې ده.
