په ملګرو ملتونو کې د ایران د دایمي استازي مرستیال غلامحسین درزي ویلي، چې هېواد یې جګړه نه غواړي، خو هر ډول تېري ته به قوي او مناسب ځواب ورکړي. هغه دا څرګندونې د ایران په اړه د ملګرو ملتونو د امنیت شورا غونډې ته په وینا کې کړې او زیاته کړې یې ده، چې دا ګواښ نه بلکې د «قانوني واقعیت څرګندونه» ده. په همدې غونډه کې د روسیې استازي پر امریکا نیوکه کړې او ویلي یې دي، چې واشنګټن د ایران دننه د لاریونونو د هڅولو او د پوځي اقدام د ګواښونو له لارې د دغه هېواد ملي حاکمیت تر پښو لاندې کوي. د رویټرز د راپور له مخې، د ملګرو ملتونو سرمنشي هم په یادې غونډه کې له ټولو لورو د زغم غوښتنه کړې او ویلي یې دي، چې تاوتریخوالي ته باید د پای ټکی کېښودل شي.
