اروپايي ټولنې له ( ای ایف سي) نړیوال مالي بنسټ سره په همکارۍ د ۵ میلیونو یورو په ارزښت د افغانستان له خصوصي برخې د ملاتړ یو پروګرام پیل کړی دی. اروپايي ټولنې په یوې اعلامیې کې ویلي چې دا پروګرام به د ښځو، ځوانانو او راستنېدونکو پر اقتصادي مشارکت ورټول وي. د مالوماتو له مخې، په دغه پروګرام کې به له خصوصي برخې سره د نږدې همکارۍ له لارې د سوداګرۍ او بوختیاوو برابرولو خوندي چاپېریال د رامنځته کولو لپاره هڅه وشي. دا ۴۲ میاشتنۍ پروګرام به د سوداګریز چاپېریال د ښه کولو، د وړو شرکتونو او نويو سوداګریزو نوښتونو د پیاوړتیا په ځانګړي ډول ښځو، راستنېدونکو او کورنیو بېځایه شویو ته، د خصوصي پانګونې د جلب، د کارموندنې د رامنځته کولو او د ښځو د اقتصادي مشارکت د زیاتوالي په موخه پلی شي.
