د صنعت او سوداګرۍ وزارت خبر ورکړی، چې په استانبول کې د ترک او افغان سوداګریو او پانګوالو ترمنځ غونډې ترسره شوې دي. د افغانستان د صنعت او سوداګرۍ وزارت د دفتر رییس محمدالله بختیار یوې غونډې ته د وینا پرمهال ویلي، چې اوسمهال افغانستان کې په کانونو، کرنې، صنعت، انرژۍ او نورو بېلابېلو برخو کې پانګونې ته ښه زمینه برابره شوې ده. نوموړي دغه راز په افغانستان کې د ترکیې د پانګونې هرکلی کړی او ټینګار یې کړی، چې اسلامي امارت د ټولو کورنیو او بهرنیو پانګوالو ملاتړ کوي او هر ډول اسانتیاوې ورته برابروي.
