د افغانستان لپاره د اروپايي ټولنې استازي جېلس برتران د کډوالو چارو له وزیر مولوي عبدالکبیر سره په کتنه کې ویلي، چې دوی په افغانستان کې د راستنېدونکو لپاره ۵۰مېلیونه یورو ځانګړې کړې دي. د نوموړي په خبره دغه پیسې به د ملګرو ملتونو د ادارو او نادولتي سازمانونو له لوري ولګول شي. د کډوالو او بېرته راستنېدونکو چارو وزارت له لوري په خپرې شوې خبرپاڼه کې د اروپايي ټولنې د ځانګړي استازي په حواله راغلي، چې په افغانستان کې بشري اړتیاوو ته په کتو یې خپلې مرستې زیاتې کړې دي. د خبرپاڼې په خبره د اروپايي ټولنې پلاوي د افغانستان او پاکستان ترمنځ وروستۍ نښتې د اندېښنې وړ بللې او ویلي یې دي، چې دغه حالت پر بشري وضعیت منفي اغېز کړی او ګڼ راستنېدونکي یې له ستونزو سره مخ کړي دي.
