د کندوز د دشت ارچي ولسوالۍ په بېلابېلو سیمو کې د ۱۸ کیلومتره سړک د بیارغولو چارې بشپړې او ګټې اخیستنې ته سپارل شوې دي. د یاد ولایت د کلیو، بیارغونې او پراختیا ریاست مطبوعاتي مسوول حمید خان مومند ویلي، چې دغه ۱۸ کیلومتره سړک د یاد ولایت په بېلابېلو ولسوالیو او کلیو کې د آغا خان بنسټ په مالي ملاتړ رغول شوی دی. د نوموړي په وینا، د یادې پروژې په پلې کېدو سره د دشت ارچي ولسوالۍ د ګڼو کلیو د اوسېدونکو د تګ راتګ ستونزې هوارې شوې او د کار په بهیر کې یې سلګونو ځايي اوسېدونکو ته د کار زمینه هم برابره شوې ده.
