د سوداګرۍ او پانګونې خونې مسوولین وايي، دا مهال په ټول هېواد کې شاوخوا ۱۵ د تېلو چاڼ ځایونه فعال دي. د دوی په وینا، دغه تاسیسات نه یوازې په کور دننه استخراج شوي خام تېل تصفیه کوي، بلکې د واردوو شویو تېلو یوه برخه چې تر ډېره ټیټ کیفیت لري، هم په همدغو چاڼ کارخونو کې چاڼ کېږي. د یادې خونې د معلوماتو له مخې، ډېری دا کارخونې په بلخ، کابل او هرات کې موقعیت لري او د هېواد د اړتیا وړ سوند توکو په برابرولو کې مهم رول لري. سرچینه زیاتوي، چې د تېر کال په مرغومي کې په بلخ ولایت کې د ۵۰ میلیونه ډالرو په پانګونه یو ستر چاڼ ځای هم پرانیستل شوی و، چې د ورځې په اوږدو کې د ۶۰۰ ټنه خامو تېلو د پروسس وړتیا لري.
