د اطلاعاتو او کلتور وزارت چارواکو د ښاروالۍ له مسوولینو غوښتي، چې د امیر دوست محمد خان ښوونځي تاریخي او لرغونې ودانۍ دې د سړک جوړولو لپاره نه ویجاړوي. د یاد وزارت د خبرپاڼې له مخې چارواکو د امیر دوست محمد خان د ښوونځي ودانۍ په اړه چې لرغونتوب یې نږدې ۱۴۰ کلونو ته رسېږي، د کابل ښاروالۍ د فني او مسلکي کميټې غړو ته سپارښتنه کړې، چې دې ودانۍ ته ځانگړې پاملرنه وکړي او له هر ډول گواښ او زیان څخه يې وژغوري.
د کابل ښاروالۍ د فني او مسلکي کميټې غړو د هنر او فرهنګ د معین په مشرۍ پلاوي ته ډاډ ورکړی، چې هڅه کوي، تر څو د سړکونو په امتداد کې واقع تاریخي ابدات له تخریب څخه وژغورل شي او په ځانگړي ډول به د امیر دوست محمد خان ښوونځي تاریخي ودانۍ هم وساتل شي.
د یادولو وړ ده، چې دې موضوع ته د لومړي ځل لپاره د پخواني ولسمشر حامد کرزي د دفتر رییس عبدالکریم خُرم اشاره کړې وه. نوموړي پر خپله اېکس پاڼه لیکلي وو، چې د کابل ښار د دهمزنگ په سیمه کې یوه تاریخي ودانۍ، چې اوس د «امیر دوست محمد خان ښوونځي» په نوم یادیږي، د ښاري پراختیا له امله د ړنګېدو له ګواښ سره مخ ده. د هغه به خبره دا ودانۍ، چې د امیر دوست محمد خان د میرمنې او د امیر شیرعلي خان د مور بيبي حلیمې پخوانی استوګنځای بلل کیږي، د تاریخي آبداتو له ډلې ګڼل کیږي. د ښاغلي خُرم په خبره، چې دا ودانۍ د کابل د دریاب پر غاړه د امیر لخوا جوړه شوې وه او باید د ښاروالۍ لهخوا وساتل شي. نوموړي له کابل ښاروالۍ او د اطلاعاتو او فرهنگ وزارت څخه غوښتي وو، چې د ودانۍ تاریخي ارزښت ته پام وکړي او د دې ملي میراث د ژغورلو لپاره بیړني اقدامات وکړي.
