په کابل کې د جاپان سفیر، تاکایوشي کورومایا، ویلي چې هېواد یې د افغانستان لپاره د یونیسف دفتر ته ۵ میلیونه ډالر مرسته ورکړې، څو دا بودجه د پولیو یا ګوزڼ ناروغۍ پر وړاندې د مبارزې لپاره وکارول شي. نوموړي دغه مرسته د افغان ماشومانو د روغتیا او هوساینې په برخه کې د جاپان د دوامدار ملاتړ یوه نښه بللې ده. بل خوا، په افغانستان کې د یونیسف د دفتر رییس د جاپان له دغې مالي مرستې هرکلی کړی او دا کار یې د پولیو ضد واکسین د پوښښ د پراخېدو لپاره یو مهم ګام وباله. ټاکل شوې چې دغه یو کلن پروګرام کې به څه باندې ۱۳ میلیونه ماشومانو ته د پولیو واکسین تطبیق شي.
