د ایراني رسنیو د راپورونو له مخې د دغه هیواد مذهبي مشر ایتالله علي خامنهيي ویلي، چې ګومان نه کوي له امریکا روانې خبرې اترې به کومې پایلې ته ورسېږي. د دانشجو خبري اژانس د راپور له مخې، خامنهيي دا څرګندونې د ایران د مخکېني ولسمشر سیدابراهیم رییسي د مړینې په یاد غونډه کې کړې دي. نوموړي زیاته کړې «اوس هم ګومان نه کوم چې کومه پایله به ورکړي او نه پوهېږم څه به کېږي.» هغه ویلي چې د تهران او واشنګټن ترمنځ نامخامخ خبرې د ابراهیم رییسي پر مهال روانې وې چې په خبره یې کومه پایله یې نه لرله. په دې وروستیو ورځو کې یو ځل بیا د ایران او امریکا ترمنځ ترینګلتیا زور اخیستی دی.
