د ایران د بهرنیو چارو وزیر سید عباس عراقچی د تهران او واشنګټن ترمنځ د خبرو اترو په دویم پړاو کې د ګډون په موخه نن سهار د ایټالیا پلازمینې روم ته رسېدلی دی. د ایران د بهرنیو چارو وزارت ویاند اسماعیل بقايي ویلي، چې د ایران او امریکا ترمنځ د غېرې مستقیمو خبرو اترو دویم پړاو به نن د ایران د بهرنیو چارو وزیر سید عباس عراقچي، او د منځني ختیځ لپاره د امریکا د ولسمشر ځانګړي استازي استیو ویتکاف ترمنځ روم کې ترسره شي. بقایي ټینګار کړی چې دغه خبرې اترې به هم لکه لومړی پړاو غیرې مستقیمې وي او د عمان د بهرنیو چارو وزیر بدر البوسعیدي په همکارۍ به ترسره شي.
