د چین – نړیوال اکمالاتو سلسله
ای ډي: 8405313
نېټه: د نومبر 25، 2024
ځای: چین
موده:دوه دقیقې او یوه ثانیې
سرچینه: (CCTV)
محدودیتونه: د چینايي وګړو لپاره نه ده
خپور شوی: 25-11-2024 04:44
وروستی سمون: 2024-11-25 07:03
بشپړ خبر
د چین لومړي وزیر لي چيانګ ویلي، چې هېواد به یې د نړیوالو صنعتي او اکمالاتي سلسلو د باثباته او بې خنډه تامین لپاره کوټلي ګامونه پورته کړي.
نوموړي دغه څرګندونې د دویم چین نړیوال اکمالاتي ځنځیر نندارتون د ګډونوالو شرکتونو او سازمانونو استازو سره د غونډې په ترڅ کې وکړې. په پام کې ده چې دغه نندارتون به د سې شنبې څخه تر راتلونکې شنبې پورې په بېجینګ کې ترسره شي.
په یاده غونډه کې ټولو استازو په دې موافقه وکړه چې د چين اقتصاد د نوښت او د سوداګرۍ د ښه چاپيريال لپاره د دوامدارې روحيې په لرلو سره د باثباته پرمختيا ښه سرعت ساتي.
دوی د چين پر اقتصاد پوره باور څرګند کړ او ويې ويل چې بهرنۍ تصدۍ او سوداګریز شرکتونه د پانګونې د پراخولو او په چين کې د لا زيات پرمختګ په لټه کې دي.
ښاغلي لي چيانګ د ګډونوالو د ویناوو له اورېدو وروسته وویل، چې د تېرو څو لسیزو په ترڅ کې د اقتصادي نړیوال کېدو پراختیا سره، د نړیوالو صنعتي او اکمالاتي سلسلې په تدريجي ډول پراخې شوې چې دې پراختیا نړۍ ته چټک اقتصادي وده ورکړې او ټولو اړخونو ته یې ګټې رسولې دي.
نوموړي د خپلو خبرو پر دوام سره وویل، چې دا ټول د دې څرګندونه کوي چې د کار تقسیم او د خواوو ترمنځ همغږي د ټولنیز پرمختګ لپاره اړین دي. هغه زیاته کړه چې مؤثر اقتصادي جریان د تولیدي عواملو د روان بهیر پورې تړلی دی. لي چیانګ ټینګار وکړ چې جلاوالی هېڅ ګټه نه لري او نه یې کومه مثبته پایله ترلاسه کوي. نوموړي وویل چې ورخلاصون یوازینۍ سم لاره ده چې ټولنې ته پرمختګ او بریا راوړی شي
لي وویل په داسې وخت کې چې نړۍ اقتصاد په کمه کچه وده کوي، تر ټولو مهمه دا ده چې پوه شو نړیوال صنعتي او اکمالاتي ځنځیرونه د نړۍ اقتصاد لپاره څومره اړین دي.
ښاغلي لي د صنعتي او اکمالاتي ځنځیرونو د همکارۍ پیاوړتیا لپاره د پراخې اجماع د رامنځته کولو غوښتنه وکړه. هغه وویل چې باید د هر ډول ګډوډۍ او جلاوالي پر ضد مبارزه وشي او د نړیوالو صنعتي او اکمالاتي ځنځیرونو ثبات باید ډاډمن شي.
نوموړي دغه راز وویل چې چین د نړیوالو صنعتي او اکمالاتي ځنځیرونو یوه مهمه برخه ده. هغه زیاته کړه چې د روان ۲۰۲۴ کال په اوږدو کې د چین اقتصاد په عمومي توګه ثابت، سالم او پرمخ روان دی.
هغه ژمنه وکړه چې د اقتصاد د ثبات لپاره به خپلې هڅې جاري وساتي، نوې د ودې سرچینې به رامنځته کړي او د عصري صنعتي سیستم پرمختګ ته به هم سرعت ورکړي چې دې سره به چین وکولی شي د نړیوالو صنعتي او اکمالاتي ځنځیرونو په همکارۍ کې لویه مرسته وکړي او د نړۍ اقتصادي بیا رغونه ته هم وده ورکړي.
لي چيانګ وویل چې هغه هیله لري چې شرکتونه به د نړیوالو صنعتي او اکمالاتي ځنځیرونو ملاتړ وکړي او په فعاله توګه به وده ورکړي. هغه زیاته کړه چې شرکتونه باید د اقتصادي نړیوال والي لپاره خپل ملاتړ جاري وساتي او په صنعتي او اکمالاتي ځنځیرونو کې نوښت په ځانګړي توګه زرغون بدلون ته ځانګړې هڅې وکړي، څو دغه ځنځیرونه نور فعال، پیاوړي او مؤثر شي.
