هندوستان د ۲۰۲۴ کال نړیوال شل اوریز جام سیالیو په پایلوبه کې سوت افریقا لوبډلې ته د ۷ منډو په توپیر ماتې ورکړه او دا ستره اتلولي یې په خپل نوم کړه. په دې پایلوبه کې د لوبې پچه هندي لوبډلمشر وګټله او لومړی یې د توپ وهنې پرېکړه وکړه. هند په ټاکلو ۲۰ اورونو کې د ۷ لوبغاړو په سوځېدو ۱۷۶ منډې وکړې او سیالې لوبډلې ته یې د ۱۷۷منډو هدف وټاکه. په ځواب سوت افریقا لوبډلې یاد هدف پوره نه شوای کړای او په ټاکلو اورونو کې یې د ۸ لوبغاړو په سوځېدو ۱۶۹ منډې جوړې کړې او لوبه یې د ۷ منډو په توپیر بایلوده. د لوبې غوره لوبغاړی پکې ویرات کولي شو ، ۷۶ منډې یې جوړې کړې وي.
