د کرکټ په نړیوال شل اوریز جام کې تېره شپه د امریکا او ایرلنډ ترمنځ لوبه د باران له کبله لغوه شوه چې په پایله کې یې امریکا د جام د اتو غوره ټیمونو پړاو ته ووته او پاکستان له وړاندې تګ څخه پاتې شو. په فلوریډا ایالت کې د پرونۍ لوبې د لغوه کېدو وروسته امریکا او ایرلنډ ته یو – یو پواینټ ورکړل شوی دی. امریکا له وړاندې د دوو لوبو د ګټلو په پایله کې څلور پواینټونه لرل او له پنځو پواینټونو سره د جام دویم پړاو ته رسیدلی دی. د امریکا او پاکستان تر څنګ په الف ګروپ کې هند، کاناډا، او ایرلنډ ځای لري. له دې ګروپ څخه هند د خپلو لومړنیو دریو لوبو د ګټلو په نتیجه کې شپږ پواینټونه لري او د جام بل پړاو ته وتلی دی.
