د افغانستان کرکټ ملي لوبډله نړیوال جام ته د چمتو والي په موخه لومړۍ تمریناتي لوبه نن شپه ۹ نیمې له عمان لوبډلې سره ترسره کوي. افغان کرکټ بورډ د ۲۰۲۴ کال شل اوریز نړیوال جام کې د افغانستان د تمریناتي او رسمي لوبو مهال وېش خپور کړی. افغان لوبډله به خپله دویمه تمریناتي لوبه د همدې میاشتې په ۱۱مه نېته له سکاټلنډ کرکت لوبډلې سره ترسره کوي. د کرکټ بورډ له لوري د خپاره شوي مهال وېش له مخې افغانستان په نړۍوال جام کې خپله لومړنۍ رسمي ګروپي سیالي د جون میاشتې په څلورمه نېټه د یوګانډا د کرکټ لوبډلې په وړاندې، دویمه لوبه د جون په اتمه نېټه له نیوزیلانډ لوبډلې پر وړاندې، درېیمه لوبه د جون ۱۴ مه نېټه پاپا نیوګینیا د لوبډلې په وړاندې او څلورمه او وروستۍ ګروپي لوبه د جون میاشتې په ۱۸مه د وېسټ اېنډیز د لوبډلې پر وړاندې تر سره کوي.
