د افغانستان د پخواني پوځ ځینې لوړپوړي چارواکي تاییدوي چې یو شمېر افغان کمانډویان د روسیې له خوا د اوکراین د جګړې لپاره استخدام شوي. د پخواني نظام د دفاع وزارت د دفتر رییس او د ظفر ۲۰۷ قول اردو قومندان جنرال عبدالروف ارغندیوال تاییدوي چې روسیه پلان لري زرګونه افغان ځانګړي ځواکونه استخدام کړي. څو ورځې مخکې فارین پالیسي راپور ورکړی و چې د روسیې له خوا له افغان کمانډویانو سره د واټسپ او سګنال له لارې اړیکې نیول کېږي او هغوی ته د اوکراین په جګړه کې د ښو امتیازاتو په بدل کې د ګډون بلنه ورکول کېږي. د افغان ځانګړو ځواکونو د قول اردو عمومي قومندان جنرال فرید احمدي هم له ځینو رسنیو سره په مرکه کې تایید کړې چې افغان ځانګړي ځواکونه د اوکراین د جګړې لپاره استخدام شوي. د افغان پوځ پخواني جنرال عبدالروف ارغندیوال وویل، ایراني چارواکو افغان ځانګړي ځواکونه مجبوره کړل چې یا به خپل هېواد ته ستنیږي یا به د روسیې په ګټه د اوکراین جګړې ته ځي.
