د صنعت او کانونو خونې اجرائيه رييس محمد کريم عظيمي وايي چې پخوا د کابل په صنعتي پارکونو کې ۶۵۰ فابريکې فعالې وې چې نږدې ۶۰ زره تنه پکې په کار بوخت وو. نوموړی وايي، دوه مياشتې مخکې فابريکو ته په ۲۴ ساعتونو کې ۲۰ ساعته برېښنا ورکول کېده خو اوس يوازې لس ساعته برېښنا ورکول کيږي. عظيمي وايي، د برېښنا د کمښت له کبله ګڼ شمېر فابريکې په ټپه ولاړې دي او په زرګونو تنو دندې له لاسه ورکړې دي. هغه وايي چې دا ستونزه یې د برېښنا شرکت له چارواکو سره هم شريکه کړې خو په وينا يې چې تر دې مهاله ورته د حل لاره نه ده موندل شوې. د برېښنا شرکت په دې اړه تر اوسه څه نه دي ويلي، خو وړاندې يې ويلي وو چې پر هغو فابريکو به برېښنا پرې کړې چې له دې درکه یې د خپلو لګښتونو پیسې نه وي تاديه کړې.
