امریکا وایي افغانستان کې یې په یوه هوایي برید کې د القاعده شبکې مهم غړی ایمن الظواهري وژلی دی. د امریکا ولسمشر جو بایډن په سپینه ماڼۍ کې د خبرو پر مهال وویل چې له څه مودې راهیسې یې په کابل کې یو هدف په نښه کړی و، خو لس ورځې وړاندې یې د امریکا مرکزي استخباراتي ادارې ته ددغه هدف د ویشتلو امر کړی دی. دده په وینا په دې برید کې یې د القاعده شبکې مشر ایمن الظواهري وژلی دی. بایډن په خپلو خبرو کې وویل چې هغه د امریکا پر ضد پراخو عملیاتو او بریدونو کې لاس درلود او په وینا یې له دې وروسته نشته دی.
بایډن دا د امنیتي ادارو لاسته راوړنه بللې ده او تر څنګ یې ټینګار کړی دی چې دغه ډول عملیات به په افغانستان کې ادامه ولري. د بایډن په وینا اجازه نه ورکوي چې افغانستان یو ځل بیا د ترهګرو پر مرکز واوړي او نړۍ ته له دې ځایه ګواښونه جوړ شي.
