چین او روسیې د افغانستان په اړه خبرې کړې دي. د افغانستان لپاره د چین ځانګړي استازي په مسکو کې د افغانستان لپاره د روسیې د ولسمشر له ځانګړي استازي ضمیر کابلوف سره کتلي دي. دواړو لورو په دې لیدنه کې د افغانستان پر روان وضعیت او دایمي ثبات خبرې کړې دي.
چینایي لوري ویلي، روسیې او چین ژمنه کړې چې د افغانستان په اړه به د دواړو لورو ترمنځ شوي تعهدات عملي کوي او په دغه هېواد کې به د دایمي ثبات په راتګ کې مرسته کوي. دوی ټینګار کړی چې د افغانستان ثبات د ټولې سیمې لپاره مهم دی او د سیمې د هېوادونو مسوولیت دی چې په دې تړاو همغږي ډېره کړي.
