د افغانستان ا.ا لوی مشر شیخ هبت الله اخندزاده د لوی اختر په مناسبت خپاره کړي پیغام کې، ټول افغانانو ته د راتلونکي لوی اختر د مبارکۍ تر څنګ ویلي چې افغانستان د ټولو افغانانو ګډ کور دی او ټول افغانان باید په ګډه د هېواد په بیارغونه کې په ونډې اخیستلو سره خپل هیوادنی مکلفیت او دیني وجیبه ادا کړي. په خپاره شوي پیغام کې د شیخ هبت الله اخندزاده له قوله لیکل شوي چې دوی ګاونډیو، د سیمې او نړۍ هیوادونو ته پوره ډاډ ورکوي، چې افغانستان به هیچا ته اجازه ورنه کړي چې له خاورې څخه یې د نورو هېوادونو امنیت ته ګواښ پيښ کړي. هغه پر نورو هېوادونو غږ کړی دی چې د افغانستان په کورنیو چارو کې دې هم د مداخلې هڅه نه کوي. نوموړي ټینګار کړی دی چې دوی د امریکا په ګډون له ټولې نړۍ سره د متقابل تعامل او تعهداتو په چوکاټ کې ښې او پياوړې ډيپلوماټیکي، اقتصادي او سیاسي اړیکې غواړي او دا د ټولو اړخونو په خیر کار بولي. هغه څرګنده کړې ده چې ا.ا په دیني او عصري علومو برخه کې د ښوونې او روزنې بهیر ته ځانګړې توجه لري. هغه د اقتصاد پياوړتیا، بیا رغونه او پاتې ستونزو له منځه وړل د حکومت او ملت ګډ مسوولیت بللی او د بیان ازادۍ ته په اشارې یې ټینګار کړی دی چې ا.ا د اسلامي اصولو او ملي منافعو په نظر کې نیولو سره د بیان ازادۍ ته هم ژمنتیا لري او ژورنالیستان کولی شي چې دغو ټکو ته په پام په ډاډه زړه خپل فعالیتونه ترسره کړي. د افغانستان ا.ا لوی مشر دغه راز له شخصیتونو سره د تماس کمیسیون باندې غږ کړی دی چې هېواد ته د راګرځېدلیو او راتلونکو هېوادوالو سره خپلې ټولې ژمنې پوره کړي او د سر، مال او عزت څخه یې په کلکه ساتنه وکړي.
