سعودي عربستان وایي ۳۰۰ حاجیان یې نیولي دي. په سعودي عربستان کې د مکې مکرمې د امنیت او تنظیم مسوولین وایي چې شاوخوا ۳۰۰ عربان یې چې له نوملیکنې پرته او په غیر قانوني توګه یې د حج په مراسمو کې ګډون کاوه نیولي او تر ۳ زره ډالرو پورې یې جریمه کړي دي.
دغه سرچینه همدا راز وایي چې دوی شاوخوا سل زره نور عربان چې په څلوېښت زره موټرونو کې د مکې پر لور روان وو، راګرځولي او مکې ته یې د تګ اجازه نه ده ورکړې. امنیتي ادارې وایي چې د حج په مراسمو کې د خورا ګڼې ګوڼې له امله اضافي کسانو ته د ګډون اجازه نه ورکوي. مکه مکرمه همدا اوس د شاوخوا یو میلیون حاجیانو کوربه ده چې دا شمېر خلک وروسته له دوو کلونو د حج په مراسمو کې ګډون کوي.
